Electric venga awm hmasate chu an remchan danin Dawrpui leh Chhinga veng biak inah an inkhawm mai ṭhin a. Inkhawmna a hlat deuh avangin inkhawm loh phah mai te pawh an awm awm e. Veng chhunga inkhawmna hran neih ṭul an ti ṭan a, kum 1962 Beihrual lai chuan in remchangah an inkhawm a. Beihrual a tawp chuan an lawina biak in lamah an inkhawm leh mai a. 

Dawrpui bialtu Pastor an rawn hnuah, ni 21.9.1963 aṭang chuan, Beihrual chhung chauh pawh ni loin, Preaching Station hming puin an inkhawm hrang ṭan ta a. Chhinga Veng Kohhran chuan enkawltu chan rawn chang nghalin, Preaching Station-a hruaitu tur pawh a rawn ruat a. Hruaitu ruatte chu Ni 1.10.1963-ah an inhmukhawm a, Puipa tur ‘Committee’ an ruat a. Preaching Station nih chhung hian Committee dang pawh siam a ni. Hetih chhung hian Primary Sikul-ah an inkhawm ṭhin.

Electric venga inkhawm hran ṭan ni, ni 21.9.1963 hi Electric Veng Presbyterian Kohhran din ṭan ni-ah pawm a ni a. Ni 11.11.1965-ah Kohhran puitling-a hlankai a ni ta a ni.