Pathian hruaina leh awmpuina avangin Electric Veng Presbyterian Kohhran Hmeichhiate rawngbawlna kum 60 chhung report tawi buatsaih theih a ni hi a lawmawm ka ti a, he hun min hruai thlengtu Lalpa chu fakin awm rawh se. Lalpa Isua Krista hmingin chibai ka buk a che u.
A din tan dan: Electric Veng Kohhran Preaching Station-a a awm atangin Ni 1.10.1963 ah Kohhran Hmeichhia hi a lo ding tan ve nghal a, a din tan tirh hi chuan O.B post 2 – Secretary leh Treasurer chauh a awm a, Chairman leh Minute ziah chu Adviser ten an ti vek mai a ni.
 
A din tirh-a hruaitute:
Pi Laltawni I (Secretary)         2. Pi Thantluangi (Treasurer)
3.  Pi Lalengmawii                      4. Pi Laithangi
5.  Pi Rochawngi                         6. Pi Khuangi
7.  Pi Laltuali                              8. Pi Laltawni II
9.  Pi Sangkhumi                         Adviser – Upa L Rozika
 
RAWNGBAWLNA TE:
 
KOHHRAN HMEICHHE INKHAWM:  Hun hmasa lamah chuan Zirtawp zanah te, Pathian Ni Chawhma Inkhawm banah te, Pathian Ni tlaiah te, Kohhran Hmeichhe Inkhawm hi neih ţhin a ni a, tunah chuan Mizoram Kohhran Hmeichhe Inkhawmpui Lian-in Mizoram pumah Inkhawm hun in ang tlanga a duan tak avangin Thawhleh zanah Inkhawm ţhin a ni ta a ni.
                    Kohhran Hmeichhe Inkhawmah hian Programme ţha tak tak hmangte-a hun hman thin a ni a, thla thar Thawhleh zan hmasa ber-ah Central aţanga Ţawngţai thupui duansa hmang leh ‘sharing’ hunte-a hman ţhin a ni a, Pathian thusawi (Sermon) te, Ruihhlo ngaipuala ţawngţairual hunte hman ţhin a ni bawk a, Ramthar zin zan leh Hmeichhiate tana ţangkai tur – hriselna chungchang in zirtirna te, fanau enkawl chungchangte, rilru hrisel neih chungchang mi thiam te sawma hun hman thin a ni bawk a,  ruihtheih thil  ţhatloh zia inzirtirnate, sum hman chungchanga in kaihhruaina te leh programme ţha tak tak hmanga hun hman ţhin a ni.

KRISTIAN CHHUNGKUA: Kohhran Hmeichhia-te din chhan pawimawh tak pakhat ‘Kristian chhungkaw din ngheh tir tura ţan lak’ tih a nih angin Kohhran Hmeichhiate hian a din tirhte aţangin Kristian chhungkaw lama hmasawn turin nasa takin ţan lak reng ţhin a nia. Kan Kohhran pawhin chhungtin ten nitin chhung inkhawm an neih theih nan kawng hrang hrangin hma a la reng ţhin a, Thawhleh zan Kohhran Hmeichhe inkhawm hunah te thupui ah hmangin nitin chhung inkhawm nei theilote tan ţawngţaina hun hman ţhin a ni. Chawngheia ţawngţainate neih ţhin a ni bawk a, Kohhran nen a ţangrual in Kristian chhungkaw campaign te neih ţhin a ni bawk.
 
 
RAMTHAR RAWNGBAWLNA:  A din tirh atangin hruaitu hmasate khan Ramthar rawngbawlna lamah hma an la nasa hle a, an sum thawh chhuah ang ang pawh Ramthar rawngbawl nan an hmang thin a ni. An sum tuakna tlangpui chu – Rawra chhut te, Thingphurh te, Jumble Sale, Puan bu siam, Inchhung khur mamawh zawrh te, sum pei pun te, thlai thar thawhlawmte, Inkhawm thawhlawm te a ni.Tun hnu zelah pawh Kohhran Hmeichhiate hian kan theih ang angin Ramthar rawngbawlna-ah thahnemngai takin hma kan la zel a ni. Hmun tam takah luangchhuakin Ramthar rawngbawlna ah hian theih tawp chhuahin kan tang ve reng a ni.
        Kohhran Hmeichhia ten Synod Mission Board kal tlangin Missionary kan chawm thin a, kum 1989 ah Missionary 1 chawma bul tan a ni a, kum tinin hma kan sawn zel a ni.
 
FEHCHHUAH PROGRAMME: Aizawl sira Kohhran te deuh te tlawh in Fehchhuah hun hi kum 2013 atangin hman thin a ni a, Member-te phur takin Bus te hire-in leh mahni remchan ang Motor te kengin kan fehchhuak thin a, hun thatak leh hlimawm tak kan hmang thin a ni. Hetiang hunah hian kan va tlawh Kohhran Hmeichhia-te hnenah thilpek pawisa kan hlan thin a ni.

BUHFAITHAM :  Electric Veng Kohhran a in dana Kohhran Hmeichhia a lo din atangin Buhfaitham hi buaipui ve nghal a ni a, a lakkhawm leh a khawn hnate thawkin, an lakkhawm sa te mimal inah dahin hralh thin a ni a, kum 1964-a Buhfaitham an hralhna tlingkhawm chu Rs 394.91 a ni. Buhfaitham hi a tirah chuan Bial 5 ah thenin thlakhatah vawi 1 lakkhawm a ni a, kum 1977 atang chuan thlakhatah vawi 2 lakhawmin vawi 1 hralh thin a ni a,Kum 1991 atang chuan Kohhran Hall ah dahin hralh chhuah a lo ni ta a, kum 1993 atangin kar tin hralh a lo ni ta bawk a, tunah chuan bial 32 a thenin, khawntu pawh mi 142 an lo awm ta a, Thawhtanni apiangin zing dar 6-ah hunserh hman hnu-ah hralh thin a ni. Buhfaitham Campaign hi a remchan angin kum tin neih thin a ni a, report te pe in, infuihnate neih thin a ni a, inkhawm zawng zawngte present pek thin a ni bawk. Kum 2024 ah Diamond Jubilee puala hmalakna pakhat atan Buhfaitham khawnna Bag tha tak mai, a khawntu apiangin an hman thin tur chu thui a ni a, a tangkai hle a ni.
 
KHAWHAR CHHUNGTE INKHAWMPUINA NEIH THIN A NI:  Kohhran chhungkua chhiat tawk an awmin khawhar chhungte pualin Pathianni hmasaber zing karah inkhawmpui-na neih thin a ni a, Ralna thilpek ‘Holy Bible’ pek thin a ni a, thlamuanna thuchahte sawiin tawngtairualna neih thin a ni. Kum 2020 kumtir atangin khawhar chhungte tan phurrit kan ni zawkmaha a lan avangin tih zawm a ni ta lo a ni.
 
PANGPAR SUB.COMMITTEE:  Electric Veng Kohhran Hmeichhe Committee hnuaiah Pangpar Sub-Committee din a ni a, Pathianni leh hun pawimawh bikah Biak Inah pangpar an khawi thin a, pangpar khawi bakah hian Biak In leh a vela pangpar leh plants enkawlte, hnatlangte ko in tihfaite, phun sawn leh phun that (re-pot) te a tul ang zelin an thawk thin a ni.
  
REFRESHMENT SUB.COMMITTEE :  Refreshment Sub-Committee hi kum 2019 atangin din a ni a, member-te hian Committee leh a tul hun apiangah thingpui leh a hmeh an ngaihtuah thin a ni.
 
KOHHRAN HMEICHHE NI :  Kohhran Hmeichhe Ni hi kum tin November Zirtawpni hnuhnung berah hman thin a ni a, Chawhmah un hi Biak Inah hmangin Central Kohhran Hmeichhia atanga thupui zir tur kan dawnte zirin, kum 70 chin chunglam lawmpuina thilpek pek thin a ni a, Inkhawm zawng zawngte thilpek (Present) kan pe bawk thin a, chawhnu lamah Variety Programme te hmangin Drama leh Musical Dance leh Programme hlimawm tak tak hmangin huntha tak leh hlimawm tak kan hmang thin a,  boruakin a zir chuan ruaite thehin hlimtak leh hlawk takin hun kan hmang thin a ni.
 
RAWNGBAWLNA DANG TE :
1) Jharkhand Mission Field-ah Kraws Sipai 4 chawm mek a ni.
2) Delhi Mission Field-ah Kraws sipai 1 chawm mek a ni.
3) Hmangaihna In, Durtlang-ah naupang 8 chawm mek a nia.(Hemi zinga 2 hi mimal thahnemngaiten Kohhran Hmeichhe hminga an chawm a ni)
4) Hermon Children’s Home, Durtlang-ah naupang 3 chawm mek a ni a (Hemi zinga 1 hi mimal thahnemngai chawm a ni)
5) Positive Women Network of Mizoram (PWNM) ah Peer Counsellor 1 chawm mek a ni. (Thlatinin mimal thahnem ngaiin Rs 1000- in a pui bawk)
6) Krismas thilpek hi kumtinin Kohhran Hmeichhiate hianVengchhung damlo nghet mi engemawzat hnenah leh Hospital hrang hrang leh Home hrang hrangahte thilpek pek thin a ni.
7) Budget-a kan sum dah te hmangin Charity Fund pualin chhawmdawl ngaite chhawmdawlna pek thin a ni bawk.
8) Missionary hmun hrang hranga awmte tan Agape Chanchinbu lak sak thin a ni a, tunah hian copy 100 lak sak mek an ni.  
                   
SUM HMUHNA TE : LAWMBAWM:  Lawmbawm rawngbawlna Kohhran Hmeichhiaten kan tanna hi ni 16.5.1989 ah a ni a, a tirah chuan mahni bial ţheuhah Bawm hung duh tur zawngin Lawmbawm hung duh apiang hnenah hun a ni a, thla khat dan zelah lakkhawm a ni a. A tir ber a pawisa tlingkhawm chu Rs. 13,464.35 a ni a, Missionary chawmna atan te hman a ni. Member ten thahnemngai taka an thawh chu a lo pung zel a, mi tam takin malsawmna an dawn avanga lawmthu sawi nan te an thawh thin a, an tu leh fate zirna lama an hlawhtlin avangte, an ran vulhte an lo tluan avangte, an sumdawnna avanga lawmthu sawi nan te Lawmbawmah hian sum an lo thawh belh zel a, chungte avang chuan Pathianzarah a lo pung zel a, a ropui hle a ni. Lawmbawm hi tunah phei chuan thlatin-a kan sum hmuh-na pawimawh leh tangkai tak a lo ni ta a ni.
 
JUMBLE SALE: Electric Veng Kohhran Hmeichhia ten kum 1970 atangin Jumble Sale hi neih tan a ni a, tun thlengin la neih chhunzawm zel a ni. Kumkhatah vawi-2 neih thin a ni tlangpui a, Kohhran Chhungkua ten an thawmhnaw hak hlui la tha si te leh la hak lohte pawh an thawh khawm a, hei hi zuar lehin sum thahnem tak hmuh thin a ni. Kan sum hmuhna pawimawh tak leh tangkai tak a la ni reng a ni.
 
RAMTHAR ZIN ZAN :Ramthar zin zan hi Kohhran Hmeichhe Inkhawmah Ramthar puala thawhlawm thawh thin a ni a, kumkhatah tum 2 te neih thin a ni a, hemi-a kan sum hmuhte hi Ramthar pual atan tangkai taka hman thin a ni.
Kohhran Hmeichhe Inkhawm thawhlawm leh a tul anga thilzawrhte pawh kan sum hmuhna ah hian a tel vek a ni.
 
 
Kohhran Hmeichhia hian vawiin thlengin Pathian hruaina leh awmpuina kan dawng nasa hle mai a, a tir atanga bul lo tantute inpekna leh thahnemngaihnate, an hnu zela hruaitu leh member-te thawhrimna leh tun thlenga member-te inpekna leh thahnemngaihnate Pathianin mal a sawm a, vawiin thlengin rawngbawlna tluang taka chhunzawm a la ni zel te hi a hlu-in a va lawmawm tak em! Min hruaitu Lalpa hnenah lawmthu kan sawi a ni.