Electric Veng Kohhran Committee chuan kan Kohhran huang chhungah Kohhran Pavalai Pawl din ve tha a ti a. Ni 18.7.2006 (Thawhlehni) zan dar 7:00-a Kohhran Hall-a mi thahnemngai, Pavalai Pawl din duh mi 26 kal khawmte chuan Upa C. Lalthanzama leh Upa R. Ramngaihzualate kaihhruaina hnuaiah ‘Electric Veng Kohhran Pavalai Pawl’ hi an din a ni. 

Electric Veng Kohhran Pavalai Pawl (EKPP) din chhan:

1. Kohhran huam chhunga Pavalai rualte, Kohhran hmalakna tawiawma Kohhran kutke ni tura buatsaih.
2. Pavalai member ni rual, sualin a tih buaite khaichhuah. 
3. Kristian chhungkaw din tura tan lak. 

Kohhran huam chhunga rawngbawl tura ngaih, pawn lama chhuah tulna a awm chuan Kohhran committee remtihna la hmasa tura tih a ni a. Electric Veng Kohhran Pavalai Pawl te hi sum tuak lo tura tih niin, Treasurer leh Fin. Secretary nei lo a ni a. Sum hmanna tur a awm chuan Kohhran committee-ah dilna thlen tur a ni. Amaherawhchu, Pavalai inkhawm thawhlawm leh Kohhran kaltlanga sum hmanna ziah fel chang a ngaih thin a, tun hnu hian Treasurer leh Fin. Secretary post hi siam belh a ni. 

Electric Veng Kohhran Pavalai Pawl OB te hi 2006-2012 chhung member ten an thlang thin a. Kohhran Committee in 2013-2021 thleng Chairman leh Secretary tur an ruat a, OB post dang chu member ten an thlang thin. 2022 atang chuan OB post zawng zawng hi member ten an thlang ta a ni.

Electric Veng Kohhran Pavalai Pawl Committee meeting hmasa ber chu ni 26.7.2006 zan Inkhawm banah Kohhran Committee Room No-II ah neih a ni a. Ni 10.8.2006 zan dar 7:00 ah Inkhawm hmasa ber chu Kohhran Hall No-II ah neih a ni. A din tirh atanga June 2008 thleng chu Ningani zanah Inkhawm thin a ni a. Kohhran Committee thuchhuak angin ni 7.7.2008 atangin Thawhtanni zanah Inkhawm thin a ni. 

Electric Veng Kohhran Pavalai Pawl din tirh atangin 2007 thleng Group 4-ah then a ni a. 2008 atangin Group 3-ah then a ni. A hnuaia mi ang hi Group hrang hrang huam chin a ni.

A din tirh laia Group huam chin:

Group-I : Upa Bial- 1 

Group-II : Upa Bial – 2 & 3

Group-III : Upa Bial – 5 & 6

Group-IV : Upa Bial – 4 & 7

Group 3-a then a nih hnua Group huam chin:

Group-I : Upa Bial- 1 & 2

Group-II : Upa Bial- 3 & 4

Group-III : Upa Bial- 5,6 & 7

1. Member nih dan/Member lak chungchang:

Electric Veng Kohhran Pavalai Pawl a tel turte chu Presbyterian Kohhran, mipa puitling, pawl thil tum pawm apiangte chu member an ni thei. Kum tin Pavalai member lak thin niin, mahni duh thu ngeia inpete member-ah ziahluh thin an ni. Member ni turin kum bithliah a awm lova, a tel awm rual, nupui nei lote pawh tel theih vek a ni.

2. Inkhawm leh Tawngtai Inkhawm:

A tlangpuiin sermon inkhawm leh rilru sawi inkhawm a hun hman a ni a. Special programme-te neiin, pawn lam mi thusawi leh zaia rawngbawl tura sawm chang a awm thin. Inkhawmna hmun atan Kohhran Hall, Sacrament Department Room, Intermediate Room, Diamond Jubilee Hall leh Golden Jubilee Hall te hman thin a ni.

Pavalai Pawl din tirh atangin ‘Pavalaite chakna hnar chu tawngtai hi a ni’ tih a ni thin a. Tawngtai Inkhawm hi Pathianni leh Nilaini zan Inkhawm ban apiangin neih thin a ni a. Hei bakah Pavalai pual thil tihna hrang hrangah tawngtai rualna neih thin a ni bawk. 2024 kum tir lam hian Kohhran Committee peng hrang hrangah thil tih a tam avangin, Pavalai Committee chuan ‘Nilai zan tawngtai inkhawm hi neih rih loh mai nise, kum chanve hnu lamah thlirho leh nise’ a ti.

3. Zaipawl:

Pavalai Pawl din tirh atangin zaipawl lamah tan lak nghal a ni a, zaipawl Conductor hmasa ber chu Pu Lalthanliana niin, Asst. Conductor hmasa ber chu Pu Manliana a ni. Kum tin Conductor leh Asst. Conductor-te ruat thar an ni a, Tualchhung Committee Member atan lak luh an ni nghal thin a ni. 

Hun hmasa lamah chuan lengkhawm hla khuang hniha rem thin a ni a. Tun hnu hian solfa hla a part kima sak niin live music leh sound track-te nen zaipawl hla rem thin a ni. 2017 khan music video pahnih ‘Sualin bo mah ila’ tih leh ‘Kum sul liam hnu’ siam a ni a. Kohhran hun pawimawh – Krismas, Good Friday leh Special programme hrang hrangah zaia rawngbawlna neih thin a ni.

4. Male Voice:

Male Voice hi ni 30.4.2015 zanah Pavalai Committee in a din a, Convener turte pawh ruat nghal an ni. 2015 atangin kum tin Male Voice member ruat thar thin a ni a. Kohhran leh Pavalai hun pawimawhahte zaia rawngbawlna an nei thin. 2023-ah music video pahnih  ‘Chu beram ven zanlaiah chuan’ tih leh ‘Van hmun ropui’ siam a ni a, YouTube-ah dah a ni. 

5. Bible chhiar leh Bible Exam:

KPP member-te hi Bible chhiar taima turin an infuih thin; Bible chhiar chhuakte lawmman pek thin an ni a. 2012 kha ‘Bible chhiar uar’ kumah puan a ni. 2015 atangin Bible exam neih tan a ni a. 2021-ah Covid-19 hripui leng avangin exam a khaihlak tih loh chu 2024 thleng neih a ni. Bible exam hi Thuthlung Thar Bu atangin a indawt zela neih chhoh thin a ni. 

6. EKPP Rising Day:

Electric Veng KPP Rising Day July ni 18 hi rokhawlhna a awm loh chuan ruai nen awmni khama lawm thin a ni a. Special programme te siamin thu leh hlaa inpawlhona leh sports hmangin Group inelna neih thin a ni.

7. Evangelism Sub-Committee:

Ni 25.1.2007-ah Pavalai General Body Meeting chuan Pavalaite thlarau lama nun chaklote dawmkang a, intihchak tawn nana hma la turin ‘Evangelism Sub-Committee’ a din a. Kum 2008 atangin Pavalai Pawl pumpuia hmalak mekna a nih tho avangin din chhunzawm a ni ta lo.

8. Rampum huap Quiz inelna:

Ni 5-27.11.2015-a Kohhran Pavalai Pawlte tan Synfo-in a Rb. H Hruaina Eng Quiz inelna a buatsaihah EKPP aiawhin Pu C. Lalramliana leh Pu C. Lalsawmliana te an tel a, Consolation prize an dawng. October-November, 2017 chhung Zarkawt Kohhranin an Kohhran Silver Jubilee lawmna puala Kohhran Pavalai Pawl Quiz inelna an buatsaihah EKPP aiawhin Pu C. Lalsawmliana leh Pu T. Vanlalchawia te an tel a, lawmman 4-na (trophy leh Rs 20,000/-) an dawng.

9. Tawngtai Bethel:

Kum tin Tawngtai Bethel a tam thei ang ber neih tum thin a ni a. Bethel neih dan tlangpui chu Biak In leh avelah te, zan riak leh lehlanga feh chhuah te a neih thin a ni a. Member pum huap leh Group hmalaknain bethel tura fehchhuah a ni bawk thin.

10. Ram pum Huap Revival Meet thlen thu:

Electric Veng Kohhranin ni 7 & 8 June, 2008 chhung Ram pum Huap Pavalai Revival Meet vawi 3-na thlen a ni a. Khawpui pawn Kohhran 10 atangin Palai 148 leh khawpui chhung atangin Palai langa kal 672 an awm. Kohhran Committee inphalna leh Kohhran mipuite tanrualna avangin tluang takin Revival Meet hi kan thleng thei a, a lawmawm hle a ni.

11. Pavalai pual Camping:

Kohhranin thlarau lam nun tihchak nan Pavalai pualin Gospel Camping a khat tawkin a buatsaih thin a, kan hlawkpui thin hle a ni. Pavalai puala Gospel Camping neih tawh dan: 

Kum	A hmun	Speaker	Camper zat
2006	Agape Camping Centre, Durtlang	Pu Lalhmingmawia (Valtea) ‘Milungngaite thian Team’	96
2009	Kohhran Hall No-I	Pastor Lalsangbera	50
2012	Kohhran Hall No-I	T. Upa Lalhunpuia‘Revival Fire Team’	76
2016	Kohhran Hall No-I	Pastor Lalrinmawia	91

12. Bungraw neih leh thilpek dawnte:

Zai hruaina khuang, guitar, keyboard, combo speaker etc. kan neih bakah KPP Flag (lian & car flag), futsal ball pahnih, EKPP album etc. leh, bungraw dahna tur steel almirah pahnih kan nei.

Thilpek dawnte:

• Pi Rotluangi, B-5 ‘A’ hnen atangin a pasal Pu V.L Ramzauva Chawngthu hriatreng nan Kristian Hlabu lian.
• Pi Zothanzami, B-3 ‘A’ hnen atangin a pasal Pu George Lalnunsanga hriatreng nan combo speaker.
• Pi Lalsupuii, B-3 ‘A’ hnen atangin a pasal Pu C. Lalsawmliana hriatreng nan Keyboard.
• Pu K. Lalramhluna, B-1 ‘B’ hnen atangin pitch pipe.
• Pu Rothangliana, B-2 hnen atangin thawhlawm khawnna dahna tray.

13. EKPP hminga rawngbawlna leh hmalakna pawimawh zualte:

• Ni 7.12.2006-ah Milungngaite thian Team-te nen Praise & Worship Service Kohhran Hall-ah neih a ni.

• Ni 23-24.3.2007-ah Rev. C. Lianhmingthanga ruaiin Kohhran Hall-ah Retreat neih a ni.

• Ni 27.3.2009-ah Reiek tlangah Pathian thu tar leh bethel a hun hman a ni a, mi 50 an kal.

• Ni 16-20.3.2010 ah E. Rotlangah Biak in sain work camp neih a ni a, member 6 kal a ni.

• Kelsih Kohhranah ni 12.4.2011 khan Upa Dr. Lalruanga, Pavalai Adviser rawngbawlna tawiawmin mi 44 an kal. Pathianni chawhnu Inkhawmah hla rem a ni.

• Ni 23.4.2011-ah Hmuifang tlangah bethel neih a ni a, mi 51 an kal.

• Ni 14.8.2011 ah Pathianni hmangin Lunglei Chanmari Kohhran Pavalai tlawh a ni a, mi 36 an kal. 

• September 2013-ah Kohhran Golden Jubilee hriatreng nan Kohhran Hall-a hman tur khuangpui leh khuangte pek a ni.

• Ni 29.11.2013-ah Aizawl Tlangnuam Kohhran Pavalai tlawh a ni. 

•  EKPP Rising Day ni 18.7.2014-ah Rev. Vanlalzuata’n sermon leh seminar in hun min hmanpui.

• Ni 16.11.2015-ah Mission Vengthlang Pastor Bial Inkhawmpuiah hla rem a ni.

• Ni 4.12.2017 zanah EKPP Music Video ‘Kumsul liam hnu’ chu Upa C. Lalthanzama, Adviser in a tlangzarh. 

• Ni 3.5.2018 zanah Durtlang Kohhran Pavalai Pawl tlawh a ni a, ni 16.7.2018  zanah min rawn tlawh ve leh a ni.

• Ni 17.12.2018 zan Inkhawm banah 2018 chhunga EKPP member thite leh natna khirh bik tuarte pualin Krismas Carol Service neih a ni a. Member pathum thite hriatreng nan an chhungte hnenah Bible hlan an ni a. Natna khirh bik tuarte mi paruk hnenah damlo kanna Rs 1,000/- theuh pek an ni.

• Ni 23.12.2018-ah Hermon Children Home, Durtlang tlawh a ni a, Krismas thilpek hlan an ni.

• Ni 23 & 24.9.2019-ah Rullam KPP tlawh a ni a. Kohhran Committee in generator min kentir chu Rullam Kohhran hnenah pek a ni a, member 42 an kal.

• Ni 21.5.2022-ah Pu P.B Vanlalauva Memorial Camping Centre, Zuangtuiah bethel neih a ni.
• Ni 23.10.2022-ah Hmunpui KPP tlawh a ni a, Hmunpui Kohhran hnenah Combo Speaker pek a ni.

•  Ni 5.6.2023 zanah Leitan Kohhran Pavalai ten min rawn tlawh. 

• Ni 27.8.2023-ah Kohhran Diamond Jubilee lawmna Project- Raidighi Biak In sak hawnnaah Pavalai aiawhin Pu K. Lalrinkima, Secretary, EKPP a kal.

• Electric Veng Pastor Bial Kohhran Pavalai Pawl Intawhkhawm vawi-5 na ni 24-25.2.2024 chhung kan Kohhranin a thleng a. Speaker chu Rev. H. Lalmuanchhana, Director, SMTC a ni a. Kohhran Pavalai Pawl bakah Inkhawm chhimtuten hlawkna an dawng nasa hle a ni.

• Ni 4-9.3.2024-ah Pu Lalawmpuia Lungen thawhna Vaseikai-ah Work Camp neih a ni a. Synod Home Mission School sak that a nih chhunga Class an lo kal theihna tur, sethlam pahnih (a dung 48 ft. a vang 12 ft) a sei sak a ni. Thawh tura ruahmansa bak a chhuat cement a chhunsak niin, electric light leh fan fit a ni a. Work Camp-ah hian mi 30 an kal a. Work Camp senso hi kan Kohhran Tualchhung sum atanga hman a ni a.

• Rampum Huap Kohhran Pavalai Pawl Intawhkhawm Vawi 6-na ni 12-14, April, 2024 a E. Lungdara neihah Palai 24 an kal. Intawhkhawm thupui ‘A chhe lai siamtha thatu’ Isaia 58:12 a ni. Speaker chu Rev. C. Zorammawia, Senior Executive Secretary a ni a. Kan Kohhran Committee in E. Lungdar kalna tur senso Rs. 40,000/- min pek bakah, Pandal chhia sak thatna EKPP hminga pek tur Rs. 20,000/- min pe a, tanpuina sum hi Online hmanga pek a ni.